2 Samuel 12

Natan gêbu Dawid

1Ma Apômtau kêsakiŋ propete Natan gêdêŋ Dawid gêja. Eŋ gêô lasê ma kêsôm gêdêŋ Dawid gebe “Ŋac luagêc sêmoa malac teŋ. Teŋ ŋac tolêlôm ma teŋ ŋac ŋalêlôm sawa. 2Ŋac tolêlôm nê domba to bulimakao taêsam ŋasec. 3Mago ŋac ŋalêlôm sawa nê gêŋ masi, domba ŋalatu têna tageŋgeŋ, taŋ eŋ gêjam ôli. Ma eŋ gêlôm nê gêŋ e kêtu kapôêŋ gêwiŋ eŋ to nê ŋapalêo to ŋac. Agêc seŋ to sênôm gaeŋ kêsêp tageŋ ma gêc bêc gêsac eŋ labum ma ŋatau gêlic eŋ kêtôm latuo teŋ. 4Bêc teŋ ŋacleŋ teŋ mêŋgêô lasê gêdêŋ ŋac tolêlôm. Ma ŋac tau gedec gebe êkôc taunê domba me bulimakao nêŋ teŋ gebe êmansaŋ êtu ŋacleŋ, taŋ jagêô lasê gêdêŋ eŋ naŋŋa. Mago eŋ kêkôc ŋac ŋalêlôm sawa nê domba tageŋgeŋ su ma kêmasaŋ kêtu ŋacleŋ, taŋ gêmêŋ gêdêŋ eŋ naŋŋa.” 5Go Dawid têtac ŋandaŋ ŋanô gêdêŋ ŋac tonaŋ ma kêsôm gêdêŋ Natan gebe “Aê jatôc lemoc êndêŋ Apômtau mata jali gebe ŋac, taŋ gêgôm gêŋ amboac tonaŋ naŋ ênaŋa. 6Ma eŋ oc êjô domba tonaŋ êtu dim aclê, gebe gêgôm gêŋ amboac tonaŋ ma taê walô ŋagec gêc eŋŋa atom.”

7Natan kêsôm gêdêŋ Dawid gebe “Ŋac tau aôm taômgoc. Apômtau, lau Israel nêŋ Anôtô, kêsôm amboac tonec gebe ‘Aê gaeŋ oso aôm kôtu lau Israel nêŋ kiŋ ma gajam aôm sa aŋga Saul lêma. 8Ma kakêŋ nêm ŋataunê andu gêdêŋ aôm gôwê kaiŋ ma ênê lauo toôŋgeŋ wacsêŋgôŋ aôm labômm ŋaô to kakêŋ gôlôac Israel to Juda dêdêŋ aôm. Ma embe tonaŋ êtôm atom naŋgo jakêŋ gêŋ ŋagêdô wacênsac ŋaô. 9Aôm laŋôm gelo Apômtaunê biŋ ma gôgôm gêŋ sec, taŋ gêjac matocanô ŋajam atom naŋ, kêtu asageŋŋa. Aôm gôjac ŋac Hetŋa Uria ŋa siŋ êndu ma gôjam ênê awê kêtu nêm awê. Aôm gôjac eŋ ŋa lau Amon nêŋ siŋ êndu. 10Amboac tonaŋ siŋ tau oc êwê nêm wakuc siŋ atomanô gebe laŋôm gelo aê ma kôkôc ŋac Hetŋa Uria nê awê su gebe êtu aômnêm awê.’ 11Tec Apômtau kêsôm gebe ‘Ôlic acgom, aê oc jakalem gêŋwapac êpi aôm aŋga aôm taômnêm gôlôac nêŋ. Ma oc jakôc aômnêm lauo su ma jakêŋ êndêŋ nêm ŋac wacbaŋ aôm ma eŋ oc ênêc êwiŋ nêm lauo ênêc awêgeŋ êndêŋ oc êkôgeŋ. 12Gebe aôm gôgôm gêŋ tau kelecgeŋ, mago aê oc jaŋgôm gêŋ tonaŋ êndêŋ lau Israel samob sêlic êndêŋ ocsalô.’ ” 13Go Dawid kêsôm gêdêŋ Natan gebe “Aê gagôm sec gêdêŋ Apômtau.” Natan gêjô Dawid awa gebe “Amboac tonaŋ Apômtau kêsuc nêm sec ôkwi, aôm oc ômac êndu atom. 14Mago kôsu Apômtau susu ŋa biŋ tonaŋ, tec nêm ŋapalê, taŋ têna êkôc eŋ naŋ, oc êmac êndu.” 15Go Natan gêmu gêja nê andu.

Dawidnê latu gêmac êndu

Ma Apômtau gêjac Dawidnê ŋapalê, taŋ Urianê awê kêkôc naŋ, e gêmac gêgôm eŋ. 16Amboac tonaŋ Dawid keteŋ Apômtau kêtu ŋapalêŋa ma gajam dabuŋ mo ma kasô nê balêm gaja jagêc nom kêtôm gêbêc samob. 17Ma ana laumata sêkô sêwiŋ eŋ sebe sêsuŋ eŋ sa, mago eŋ gedec ma geŋ gêŋ gawiŋ êsêac atom amboac tonaŋgeŋ. 18Gêdêŋ bêc kêtu 7ŋa ŋapalê tau gêmac andu. Ma Dawidnê sakiŋwaga têtêc gebe sêsôm ŋapalê gêmac endu ŋawae êndêŋ eŋ. Êsêac taeŋ gêjam gebe “Gêdêŋ taŋ ŋapalê gêmoa mata jaligeŋ naŋ, aêac tasôm biŋ gêdêŋ eŋ, mago kêkêŋ taŋa aêac atom. Aêac tasôm ŋapalê gêmac êndu su ŋawae lasê êndêŋ eŋ amboac ondoc. Oc moae eŋ êŋgôm tau paliŋ.” 19Mago gêdêŋ taŋ Dawid gêlic êsêac sêjac biŋ kesec- kesec gêdêŋ tauŋ naŋ, eŋ kêjala gebe ŋapalê gêmac êndu su ma kêtu kênac nê sakiŋwaga gebe “Ŋapalê gêmac êndu me.” Êsêac sêjô eŋ awa gebe “Aec, gêmac êndu.” 20Go Dawid gêdi sa aŋga nom ma gêliŋ bu to geŋ oso ôli ma kêsô ŋakwê teŋ. Go kêsô Apômtaunê lômbec jaketeŋ mec. Su, go gêmu gêja taunê andu ma keteŋ gêŋ taniŋŋa. Tec sêkôc gêŋ dêdêŋ eŋ jageŋ. 21Ma ênê sakiŋwaga sêsôm gêdêŋ eŋ gebe “Gôgôm amboac tonaŋ ŋam amboac ondoc. Ŋapalê mata jali gêmoa ma gôjam dabuŋ mo to kôtaŋ ŋanô kêtu eŋŋa. Ma gêdêŋ taŋ ŋapalê gêmac êndu su naŋ, gôdi sa ma goeŋ gêŋ.” 22Ma eŋ gêjô êsêac aweŋ gebe “Gêdêŋ taŋ ŋapalê mata jali gêmoa naŋ, aê gajam dabuŋ mo to kataŋ taŋiboa gebe taêc gêjam amboac tonec gebe ‘Asa kêjala Apômtau, oc moae taê walô aê ma êkêŋ ŋapalê êmoa mata jali.’ 23Galoc gêmac êndu su, tec janam dabuŋ mo êtu ageŋŋa. Oc jakôc eŋ êmu êmêŋ êtiam me. Aê oc jandêŋ eŋ jana, mago eŋ oc êmu êndêŋ aê êtiam atomanô.”

24Go Dawid gêjam malô nê awê Batseba ma kêsô jagêc gêwiŋ eŋ. Ma eŋ kêkôc ŋapalê ŋac teŋ ma gê ênê ŋaê gebe Salomo. Ma Apômtau têtac gêwiŋ eŋ ma kêsakiŋ propete Natan gebe ê ênê ŋaê gebe Jedidia (ŋam gebe Anôtô têtac gêwiŋ) kêtu Apômtauŋa.

25

12:26 — 14:20 Dawid kêku lau Amon nêŋ malacsêga tulu. Mago Dawidnê gôlôacnêŋ biŋ kêlênsôŋ. Dawid latu Absalom gêjac lasi têna teŋŋa êndu kêtu gêgôm sec gêdêŋ Absalom lasio Tamarŋa. Absalom gêc su jagêmoa gamêŋ Gesur jala têlêac. Joab kêkac Dawid gebe êkalem Absalom êmu êmêŋ.